شَعْشَعة

أنْغَامْ صَوْتِكْ هِدِيْل طْيُوْر

                شَرَّعْ لَهَا الْقَلْب دِيْوَانِهْ

كَنّ الحكايَا ربيْع زْهُوْر

               رُوْح الْبَعَثْرِيْ وْريْحَانِهْ

أهْدَيْتني دُرِّكْ الْمَنْثُوْر

              دَانِهْ تشَعْشِعْ وَرَا دَانِهْ

مِنْ مَبْسَم ٍ لى تِبَسَّمْ نُوْر

              يِخْجِلْ ضِيَا النُّوْر مِرْجَانِهْ

سَمَّيْت بِاسْم الله الْمَذْكُوْر

            عَنْ شَرّ حِسَّادْ عَيَّانِهْ

عَلَيْك ثَوْب الْغُوَى مَغْرُوْر

            مِنْ يَوْم عَطَّرْ بِكْ أرْدَانِهْ

والْبَانْ مَفْتُوْن بِكْ!! مَبْهُوْر!!

            أحْرَجْت مِنْ قَدِّكْ أغْصَانِهْ

مِنْ زِدّ كِلّ الْبِنِيّ الْحُوْر!!

            لِكْ الْحَوَرْ جَادْ بَاعْيَانِهْ

يعِيْش طول الْعِمِرْ مَسْرُوْر

            من وَافِقَتْ عَصْرِكْ أزْمَانِهْ

لِكْ كِلّ مَا فِيْ يَدِيْ مَنْذُوْر

            يِفْدَاكْ لو غِلْيَتْ أثْمَانِهْ

والْعِمِرْ يِفْدَاكْ والمَعْمُوْر

            وْرَوْعَةْ زمَانِيْ وْرَيْعَانِهْ